【科學驗漏水:紅外線滲漏檢測 – 秒速搵出滲漏】

【科學驗漏水:紅外線滲漏檢測 – 秒速搵出滲漏】

肉眼睇唔到都驗得到?撇除一啲嚴重嘅滲漏情況(石矢剝落、鋼筋外露等)普遍業主都唔傾向拆卸原有裝修「砍掉重練」…但係唔鑽開坺牆,點睇到邊度漏?

今次同大家介紹「紅外線熱能測試」呢款嶄新滲漏檢測,可以喺唔破壞任何裝修嘅情況下調查到牆身同天花入面嘅漏水情況。

1)原理係點?

水份、石矢、瓷磗、空氣,以上每種物質嘅「熱容量(Heat Capacity)」都唔同。水嘅吸熱能力比較大,滲漏到建築物料表面嘅水份會吸走周圍嘅熱能量,造成溫差。

同時,當建築物嘅牆身老化/造工唔好/損耗,佢地多數會喺石矢、表面水泥、或瓷磚之間出現好細好細嘅空隙(Sealed Air Space),呢啲空隙有隔熱能力,一樣會形成「異常溫差區域」。

運用高像素紅外線熱像儀探測牆身或天花表面,專家可以秒速搵出建築物料上嘅損毀或滲漏位置,從而作進一步調查。

圖1:我們以肉眼觀察這個窗台和周圍的牆身,看似正常。

圖2:運用紅外線儀器作滲漏檢測,馬上看到有異常低溫區域(藍色),該位置有機會存在滲漏,需要配合其他儀器作進一步調查。

2)配合其他滲漏檢測儀器

用紅外線搵出溫差區域之後,配合其他儀器測試,好容易就分析到有冇漏水。舉例說,紅外線測試檢查到牆身有溫差後,專家可以對溫差區域進行表面濕度量度,檢查有冇滲漏。

喺調查滲漏源頭嘅時候,專家一般會進行「試水」。舉例說,如果屋企懷疑外牆滲漏,專家一般會對外牆進行射水,並喺試水前後分別進行紅外線同濕度測試,如果射完水之後嘅數值提升,咁就證實到有滲漏問題。

4)新裝修實唔會漏?記得做好檢查!

過往有唔少新裝修嘅浴室,明明已經造咗防水膜,但都照樣漏水落樓下,令業主百思不得其解。其實有造防水膜,並唔代表個防水膜造得完美,好多時師父以為整好咗,但其實有好多窿窿罅罅即使漏咗水肉眼都未必睇得到!到舖咗磗先發現滴濕樓下,咁就要畀錢整過喇!

唔想新裝修兩個月玩完?記得喺完成咗浸水程序之後做一次紅外線滲漏檢測,如果防水膜有漏,底部多數會有積水,肉眼睇唔到,但儀器一掃就會發現。

5)客觀証據好重要!

家居漏水多數涉及維修、投訴、索償或訴訟,所以漏水報告上有清晰客觀嘅數據同記錄極為重要!有晒數據同相片記錄,將來有事都唔駛口同鼻拗。有冇漏水?數據就係最好嘅證據!

紅外線滲漏檢測總結

紅外線儀器

主要用途:
– 初步漏水檢測
– 外牆檢測
– 全屋漏水檢查

優點

– 零破壞性
– 性價比高
– 能迅速檢查大面積/範圍
– 提供客觀數據記錄
(可用作證供或陳述)
– 能廣泛應用,配合其他檢測儀器/方法全面調查漏水

缺點

– 難以獨自找出水源,需配合其他儀器或方法分析
– 光面物料有機會造成反射,檢測的準繩度會相較於在啞面物料上應用時低

以上資訊由 e-myhouse樓宇醫生 建築師團隊  提供,原文刊登於中國平安(香港)Facebook及網站