驗漏水邊個有資格?市面上各種「專家」有咩分別?

驗漏水邊個有資格?市面上各種「專家」有咩分別?

相信大家喺格價嘅時候都會遇到一個問題:究竟搵師父驗漏水,點先為之專業?裝修公司、工程公司,或者公證行每間嘅專業資格都唔同?點解價錢會爭咁遠?emy喺度教下大家點樣喺格價/揀服務嘅時候保障自己。

一)AP(認可人士AUTHORIZED PERSON)專業階梯上的最高資格

認可人士:以有關的建築工程或街道工程統籌人的身份監督工程圖則的制訂,在證明書上簽字、制定監工計劃書、並監督施工過程,以確保有關工程安全進行。

認可人士係同屋宇署或相關政府部門溝通和協調的橋樑,如果你收到屋宇署或地政署的命令,認可人士會作出專業的意見並與有關的政府部門作協調、進行工程等以解除命令。

認可人士名冊包括:建築師/測量師/工程師

要成為AP(認可人士),首先要得到以上專業資格,然後再額外通過屋宇署嘅審核同面試,一啲都唔容易。以建築師為例,一般要讀個4年嘅建築學士學位,再加2年碩士同2年工作經驗先可以考建築師牌,成為註冊建築師之後仲要至少做多一年先有得去考AP。

認可人士作為專業階梯上嘅頂點,專業權威無容置疑。如果你嘅漏水情況有機會需要索償或進行訴訟,咁就好大機會需要AP簽名嘅檢測報告。

市面上唔少公司都有提供認可人士嘅服務,一分錢一分貨,佢地專業資格最高,收費都自然最貴,大部份有認可人士參與嘅服務都需要五位數嘅價錢。

值得注意嘅係上面列舉嘅認可人士有三種:建築師、測量師、同工程師嘅專業背景其實非常唔同,喺揀嘅時候記得check返嗰位專家係咪真係以樓宇/建築物為執業背景,因為相關經驗同知識對於準確地搵出漏水源頭,同寫到份有說服力嘅報告都係非常重要!

二)持牌師父

市面上好多裝修/工程公司嘅師父好多都有多年嘅驗漏水/維修經驗,同埋持有屋宇署、機電工程署、水務署等等各個部門提供嘅牌照同證書。師父嘅牌照可以循正式途徑查冊,算係有個標準,但呢啲牌照嘅門檻較低,兩個持有同一個牌照嘅師父,喺實力上嘅差距可以好大,格價嘅時候只可以依賴佢地嘅經驗、技術同口碑去作比較。

另外要注意嘅係,持牌師父雖然好多都經驗實力俱全,但法庭對於專家證人同專家報告有清晰標準,如果有機會要訴訟、索償,記得要查清楚間公司係咪有所需嘅專業資格。

三)驗樓師

市場上亦都有唔少公司以「驗樓師」為名銜去為客戶提供服務。要留意嘅係喺專業範疇嘅定義上,其實係冇一項資格叫做「驗樓師」。「驗樓師」只係憑驗樓經驗而自稱,冇任何官方準則。

真正嘅專業人士(eg. 建築師)係需要透過考核去得到專業資格,「驗樓師」基本上冇乜標準,消費者只可以靠口碑同信譽去判斷係咪合適。如果你現在或者將來需要進行投訴、索償或者訴訟,一份冇真正專業資格嘅報告好大機會不被接納,所以畀錢之前,記得問清楚!

總結:

法庭對專家證人、專家報告有好清晰明確嘅定義。無論係投訴、索償、談判,抑或去到法律程序,一份有專業人士同認可人士認證嘅報告都會大大提升你嘅勝算。越專業嘅報告價錢越貴,但亦好大機會免卻你之後煩惱。

屋企有漏水問題,想聽最專業嘅意見?馬上做一次免費網上評估,由e-myhouse專業團隊解答你所有問題!